(ស្វាយរៀង) ៖ ដោយអនុវត្តតាមបទបញ្ជាដ៏យ៉ាងម៉ឺងម៉ាត់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងមានការចង្អុលដឹកនាំដោយលោកឧត្ដមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង កាលពីថ្ងៃទី១៨ ខែមីនា ឆ្នាំ២០២៦ លោកឧត្ដមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន បានដឹកនាំកម្លាំងការិយាល័យជំនាញ សហការជាមួយកម្លាំងអធិការដ្ឋាននគរបាលក្រុងបាវិត ចុះប្រតិបត្តិការបង្ក្រាបករណីជួញដូរ ដឹកជញ្ជួន រក្សាទុក កែច្នៃ ប្រើប្រាស់គ្រឿងញៀន និងកាន់កាប់អាវុធ គ្រាប់រំសេវដោយខុសច្បាប់ ឃាត់ខ្លួនជនសង្ស័យបានចំនួន ០៥នាក់ ប្រុស (ជនជាតិវៀតណាម ០៤នាក់ ជនជាតិចិន ០១នាក់) នៅបន្ទប់ជួលមួយកន្លែង ស្ថិតនៅភូមិបាវិតកណ្ដាល សង្កាត់បាវិត ក្រុងបាវិត។
ដកហូតវត្ថុតាង រួមមាន៖ សារធាតុញៀនគ្រប់ប្រភេទ ទម្ងន់ ៤៤គីឡូក្រាម ៧៦៨.២២ក្រាម, សារធាតុមិនច្បាស់ទម្ងន់ ៨គីឡូ ៩៦១.១៤ក្រាម, ជញ្ជីងថ្លឹង ១០គ្រឿង, អាវុធខ្លី ០៤ដើម, បង់ ០៤, គ្រាប់ចំនួន ២០០គ្រាប់, ទូរស័ព្ទ ០៦គ្រឿង, រថយន្ត ០១គ្រឿង និងសម្ភារប្រើប្រាស់មួយចំនួនទៀត។
បច្ចុប្បន្នជនសង្ស័យ រួមទាំងវត្ថុតាង ត្រូវបានសមត្ថកិច្ចជំនាញ កំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធី៕
