ចេញផ្សាយ ថ្ងៃទី 19 ខែឧសភា ឆ្នាំ 2026
ដោយ÷ វីស៊ីអេស ធីវីអនឡាញ
(ខេត្តកណ្តាល)៖ រដ្ឋបាលខេត្តកណ្តាល បានរៀបចំពិធីចុះហត្ថលេខាលើផែនទីព្រំប្រទល់រដ្ឋបាលឃុំ សង្កាត់ ទូទាំងខេត្តកណ្តាល ដោយមានការចូលរួមពីថ្នាក់ដឹកនាំជាន់ខ្ពស់ ក្រសួងរៀបចំដែនដី នគរូបនីយកម្ម និងសំណង់ ព្រមទាំងអាជ្ញាធរមូលដ្ឋានគ្រប់លំដាប់ថ្នាក់។
ពិធីនេះប្រព្រឹត្តទៅក្រោមអធិបតីភាព ឯកឧត្តម ឈឿន ប៉ុណ្ណារ័ត្ន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់, ឯកឧត្តម គួច ចំរើន អភិបាលនៃគណៈអភិបាលខេត្តកណ្តាល និង ឯកឧត្តម វុឌ្ឍី វណ្ណារ៉ា អគ្គនាយក នៃអគ្គនាយកដ្ឋានសុរិយោដី និងភូមិសាស្ត្រ ព្រមទាំងមានការអញ្ជើញចូលរួមពី លោក-លោកស្រី អភិបាលក្រុង ស្រុកទាំង១៣ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត មន្ត្រីបច្ចេកទេស និងលោក-លោកស្រី មេឃុំ ចៅសង្កាត់ទូទាំងខេត្តយ៉ាងច្រើនកុះករ នាព្រឹកថ្ងៃទី១៨ ខែឧសភា ឆ្នាំ២០២៦។
ពិធីចុះហត្ថលេខានេះ ធ្វើឡើងបន្ទាប់ពីក្រុមការងារបច្ចេកទេស និងអាជ្ញាធរមូលដ្ឋាន បានខិតខំប្រឹងប្រែងចុះវាស់វែង កំណត់និយាមកា និងដោះស្រាយវិវាទព្រំប្រទល់នានា រហូតទទួលបានការឯកភាពគ្នាយ៉ាងពេញលេញពីគ្រប់ភាគីពាក់ព័ន្ធ។
ក្នុងឱកាសនោះ ឯកឧត្តម គួច ចំរើន អភិបាលខេត្តកណ្តាល បានឲ្យដឹងថា ក្នុងចំណោម ១២៧ ឃុំ សង្កាត់នៅទូទាំងខេត្ត បច្ចុប្បន្នសម្រេចបាន ៩០ឃុំ សង្កាត់ ដែលក្រសួងរៀបចំដែនដីបានផ្តល់ការគាំទ្រផែនទីរដ្ឋបាលរួចរាល់ ខណៈនៅសល់ ៣២ ឃុំ សង្កាត់ទៀត ដែលត្រូវបន្តពិនិត្យ និងរៀបចំផែនទីព្រំប្រទល់បន្ថែមឲ្យបានពេញលេញ។
ឯកឧត្តមអភិបាលខេត្តបានបន្តថា ការងារនេះត្រូវបានជំរុញយ៉ាងសកម្មតាមរយៈការសម្របសម្រួលរវាងស្រុកនិងស្រុក ខេត្តនិងខេត្ត ដើម្បីឲ្យអាជ្ញាធរមូលដ្ឋានឈានដល់ការឯកភាពគ្នាលើព្រំប្រទល់រដ្ឋបាលឃុំ សង្កាត់ ក្រុង និងស្រុក ទើបអាចឈានទៅការបោះពុម្ពផែនទីផ្លូវការបាន។
ឯកឧត្តមក៏បានគូសបញ្ជាក់ថា ខេត្តកណ្តាលជាខេត្តព័ទ្ធជុំវិញរាជធានីភ្នំពេញ មានព្រំប្រទល់ជាប់ខេត្តតាកែវ កំពង់ស្ពឺ កំពង់ឆ្នាំង កំពង់ចាម និងព្រៃវែង ក្រោមការគាំទ្រពីក្រសួងរៀបចំដែនដី ការចុះហត្ថលេខាលើផែនទីរដ្ឋបាលឃុំ សង្កាត់លើកនេះ គឺជាសមិទ្ធផលសំខាន់មួយ ដែលផ្តល់នូវឯកសារគតិយុត្តច្បាស់លាស់ សម្រាប់កំណត់ដែនសមត្ថកិច្ចរបស់មូលដ្ឋាននីមួយៗ និងជាមូលដ្ឋានក្នុងការទប់ស្កាត់ និងដោះស្រាយវិវាទព្រំប្រទល់ និងបញ្ហាដីធ្លីនានា។
ជាមួយគ្នានេះ ឯកឧត្តមអភិបាលខេត្ត បានថ្លែងអំណរគុណ និងកោតសរសើរដល់ក្រុមការងារបច្ចេកទេស និងអាជ្ញាធរគ្រប់លំដាប់ថ្នាក់ ដែលបានខិតខំប្រឹងប្រែងរហូតសម្រេចបានលទ្ធផលនេះ ឯកឧត្តមក៏បានណែនាំឲ្យបន្តថែរក្សា និងការពារបង្គោលព្រំប្រទល់ ព្រមទាំងប្រើប្រាស់ផែនទីនេះជាមូលដ្ឋានសម្រាប់ការគ្រប់គ្រង និងអភិវឌ្ឍមូលដ្ឋានឲ្យមានប្រសិទ្ធភាព។
ក្នុងឱកាសនោះដែរ ឯកឧត្តម ឈឿន ប៉ុណ្ណារ័ត្ន បានលើកឡើងថា ការកំណត់ព្រំប្រទល់រដ្ឋបាលនេះ បានផ្តើមចេញពីការវាស់វែងជាប្រព័ន្ធ ដោយមានការចូលរួមពីគណៈកម្មការរដ្ឋបាលខេត្ត ក្រុង ស្រុក អាជ្ញាធរមូលដ្ឋាន និងប្រជាពលរដ្ឋ ដែលជាមូលដ្ឋានសំខាន់ក្នុងការកំណត់ព្រំប្រទល់ឲ្យមានភាពច្បាស់លាស់។
ឯកឧត្តមរដ្ឋលេខាធិការបានបញ្ជាក់ថា ការចុះហត្ថលេខាលើផែនទីព្រំប្រទល់រដ្ឋបាលឃុំ សង្កាត់ គឺមានសារៈសំខាន់ខ្លាំង ក្នុងការធានាសុវត្ថិភាពគតិយុត្ត ការងាយស្រួលក្នុងការគ្រប់គ្រងដីធ្លី ការផ្តល់សេវាសាធារណៈ និងការជំរុញការអភិវឌ្ឍសេដ្ឋកិច្ច-សង្គមនៅមូលដ្ឋាន។
ឯកឧត្តមក៏បានគូសបញ្ជាក់បន្ថែមថា ការកំណត់ព្រំប្រទល់នេះ មិនមែនជាការបែងចែកទឹកដីដាច់ដោយឡែកនោះទេ ប៉ុន្តែជាការបង្កើនប្រសិទ្ធភាពក្នុងការគ្រប់គ្រង និងបម្រើប្រជាពលរដ្ឋឲ្យរស់នៅប្រកបដោយសុខដុមរមនា និងការអភិវឌ្ឍរួមគ្នា៕
📢ចេញផ្សាយបន្តដោយ #VCSTVOnline
🌐 http://www.vcstvonline.com.kh
