(កំពង់ស្ពឺ) ៖ ករណីគ្រោះថ្នាក់ចរាចរណ៍កណ្ដាលក្រុងច្បារមន បណ្ដាលមនុស្សម្នាក់បានស្លាប់ភ្លាមៗនៅនឹងកន្លែង ចំណែកម្នាក់ទៀតរបួសស្រាល ក្នុងករណីរថយន្តបុកម៉ូតូ ០២គ្រឿង កាលពីវេលាម៉ោង ៦៖៣០នាទីល្ងាច ថ្ងៃទី២៧ ខែមីនា ឆ្នាំ២០២៦ នៅលើផ្លូវលេខ១៤៣ ស្ថិតនៅភូមិទួលគក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។
មុនពេលកើតហេតុ រថយន្ត ០១គ្រឿង ម៉ាក TOYOTA HILUX REVO ពណ៌ស ផ្លាកលេខ ភ្នំពេញ 2BX-9781 អ្នកបើកបរឈ្មោះ មិន ហេង ភេទប្រុស អាយុ ៥៦ឆ្នាំ រស់នៅភូមិគោក ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ មុខរបរស្មៀនឃុំ បើកបរពីទិសខាងត្បូង ទៅទិសខាងជើង លុះមកដល់ចំណុចកើតហេតុ បានទៅបុកពីក្រោយម៉ូតូ ០២គ្រឿង ទី១ ម៉ូតូម៉ាក HONDA DREAM C125 ពណ៌ខ្មៅ ផ្លាកលេខ កំពង់ស្ពឺ 1F-6117 អ្នកបើកបរឈ្មោះ ទឹម សារ៉េត ភេទប្រុស អាយុ ៤៥ឆ្នាំ ស្លាប់នៅនឹងកន្លែង រស់នៅភូមិអំពែភ្នំ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ និងទី២ ម៉ូតូម៉ាក HONDA BEAT 110CC ពណ៌ខ្មៅ ពាក់ផ្លាកលេខ ភ្នំពេញ 1KG-2661 អ្នកបើកបរឈ្នោះ សែម ស្រីទី ភេទស្រី អាយុ ២៧ឆ្នាំ រងរបួសស្រាល រស់នៅភូមិត្រស់សាលា សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ដែលកំពុងតែបើកបរនៅពីមុខស្របទិសគ្នា បានបុកពេញទំហឹង។
ក្រោយកើតហេតុ សមត្ថកិច្ចនគរបាលបានចុះដល់កន្លែងកើតហេតុ បានចំណាត់ការឃាត់អ្នកបើកបររថយន្ដ និងជួយសង្រ្គោះអ្នករងរបួស ចំណែកអ្នកស្លាប់ប្រគល់ជូនដល់ក្រុមគ្រួសារ ដើម្បីធ្វើបុណ្យតាមប្រពៃណី៕
